Infografía para coñecernos mellor

A infografía 3D e multimedia parece desenvolverse moi ben no campo da divulgación científica e médica. Algúns dos mellores gráficos interactivos de El Pais e especialmente de El Mundo, enmárcanse dentro deste campo, onde información e ilustración poden atopar un bo equilibrio.

E é que con vídeos como estes, quedan claras as tremendas posibilidades da infografía multimedia en campos educativos. Na miña época, os vídeos que nos poñían na clase de bioloxía non eran tan impresionantes





De todas formas, sigo pensando que a "xeración E.S.O." está orfa dos vídeos de "Érase una vez...". Canta anatomía e historia aprendemos con eles...

Vía: MedTempus

Guerra de software: ¿De que lado estás?

Software Wars é un moderno taboleiro de risk pero ambientado nas loitas entre distintas empresas e filosofías de software na actualidade. Como din en Microsiervos, algunhas zonas están bastante sobredimensionadas e outras moi subdesenvolvidas (fixádevos en Google), pero como divertimento friki, ten o seu punto.

Hai outras versión anteriores na páxina de Steven Hilton, o autor que dan idea das revoltas emprendidas polos "rebeldes" Mozilla -relevo do extinguido grupo de disidencia Netscape- e como o Imperio Microsoft tivo que multiplicar as frontes de combate dende o ano 98.



Vía: Microsiervos

A fame inscaciable dos 3 grandes buscadores

Nos últimos anos vimos como os grandes buscadores de internet se convertían en xigantes multifuncionais. A mellor proba é Google e toda a súa serie de funcionalidade. Creo que en canto consigan poñer en marcha un programa que descargue café vía wifi serei quen de realizar todas as miñas actividades diarias a través dos seus servizos e programas.

Este gráfico interactivo bastante completo amosa as inversións e adquisicións dos 2 grandes buscadores, Yahoo! e Google, que foron incorporando ós seus portais. Tamén inclúe a Microsoft, algo que na miña opinión sesga un tanto a comparativa, pois aparecen operacións que teñen que ver con outras áreas devinculadas do buscador. En todo caso, da idea da magnitude que están a coller estes 3 xigantes da informática.

Vía: Genbeta

A denigración da imaxe

Miña irmá, cumpríu hai un par de meses quince anos. Moi ó meu pesar non manifesta a máis mínima inquietude que vaia máis alá do círculo próximo que a rodea. Nada de informativos, nada de xornais, nada de política. Teño comprobado que ese virus tamén afecta as súas amizades e ós meus primos desa mesma xeración. Claro que iso non me consola en exceso e sigo preguntándome cada día en que fallamos con ela...

Polo tanto entenderás a miña sorpresa cando onte me pregunta: "¿Viste cómo se pasaron los del ABC?" e saca esta páxina da súa mochila.

- ¿Pero que é o que che parece mal?
- Pues eso de los dibujitos... Vale que eran asesinos, pero eso no se le hace ni a los animales...

Mires por onde a mires, esta infografía é terrible, totalmente aséptica, mecánica coma se estivese escrutando os últimos datos do IPC. Peor aínda a súa rigurosida na técnica, buscando incluso o punto artístico e plástico. Non falta nin unha soa vértebra e todo o proceso é relatado minuciosamente con detalles do tipo "Si la caída es demasiado corta el reo puede morir estrangulado. Si es demasiado larga puede producirse la decapitación" ou "Cuerda: lubricada con cera o jabón para asegurar el deslizamiento suave".

¿Iso somos os xornalistas? ¿Asépticos escribas dos intestinos da información? Se para iso vale o xornalismo, se a revolución multimedia e infográfica só serve para describir sinteticamente como matar a un home pendurándoo dunha corda, pois noraboa, benvidos á Sociedade da Información.

___
Enlace: Gráfico
Enlace: Páxina completa

Os rostros da morte

Coas súas virtudes e defectos, o New York Times é para moitos xornalistas un dos espellos usados para ver con que curvatura se levanta hoxe a Realidade. Será dificil que algún día consiga sacudirse de todo ese xesto de "xornal de púlpito", esa pátina que o tempo e o prestixio foi acumulando sobre a súa historia, pero sabes que a ollada do NYT é necesaria, e que se non existise habería que ¡nventalo.

"Faces of the dead" é a infografía multimedia sobre ós 3.000 soldados estadounidenses mortos ata agora na guerra de Iraq. Como soe ser norma nos seus gráficos é moi completo, riguroso e sobrio, pero lonxe de deixarse levar pola frialdade dos datos opta por poñerlle rostro a cada soldado, ademais de contar con audio a historia de varios deles.



Só queda agardar que algún día, os xornais se acorden tamén das outras víctimas, os que sufren as guerra que tan ben sabemos exportar, deslocalizar e globalizar.

Cortázar e Galicia

E rematando a sesión de autobombo comezada hai un par de días, anunciamos por fin que a criatura saiu da fase larvaria: o especial web "Cortázar en Galicia" xa está colgado na rede. Foi un parto doloroso, pero parece que o bicho sairá adiante ;)

Podedes acceder a través do banner colocado na web do CGAI ou na dirección www.cgai.org/juliocortazar. De momento pódese visualizar en galego e castelán pero nos próximos días engadiranse tamén as versións en francés e inglés.

A web realizouse con motivo do ciclo "Outono Cortázar"que reuniu en Santiago a expertos na obra do escritor arxentino e que tiña como estrela a exposición "Ler imaxes: o arquivo fotográfico e fílmico de Julio Cortázar". O especial multimedia nace como unha extensión desta expo, facendo unha recreación virtual en 3D dos dous espacios nos que estivo (Pazo de Fonseca e Igrexa da Universidade). Dende aí, é posible acceder a boa parte do material exposto. E digo boa parte, porque ó noso pesar, autores dos dereitos dalgunhas fotografías e vídeos non tiveron a ben cedelos para a mostra virtual. Por iso, aínda que se tentou respetar ó máximo a esencia da exposición orixinal, vímonos obrigados a facer algúns axustes para non deixar algunhas zonas completamente descompensadas respecto a outras.

A páxina tamén tenta expoñer brevemente dúas "patas" do vínculo de Cortázar con Galicia: as viaxes que fixo por aquí coa súa muller, Aurora Bernárdez, orixinaria de Maside (Ourense) e a súa relación con exiliados galegos como Luís Seoane, Arturo Cuadrado, Rafael Dieste ou Lorenzo Varela. As outras seccións son Cronopioloxía, que fai un repaso gráfico ás datas fundamentais da súa vida, e Universo Cortázar, tres minúsculas "pílulas animadas" ambientadas na literatura cortazariana.

O traballo foi realizado integramente por catro xornalistas con coñecementos moi "caseiros" de flash e programación web. E iso nótase. Non se trata dunha deslumbrante experiencia interactiva chea de virguerías, senón que dadas as nosas limitacións técnicas, tentamos facer fincapé no contido.

Espero vos parezca polo menos digno, e que tras visita-la web, fagades unha mínima contribución económica para que os artistas poidan acudir no 2007 a cursos de animación flash, programación e perfeccionamento de deseño 3D ;)

Xeoevolución das relixións

O recomendable sitio Maps of War incorpora unha nova infografía, esta vez coa evolución histórica e xeográfica das grandes relixións. Bótase en falta un mínimo de atención ós cultos minoritarios, pero se só lle podes adicar un par de minutos resulta moi ilustrativa e didáctica. Igual que nos anteriores mapas interactivos, ofréceche a opción de descargarte o arquivo swf.

PostMortem: Unha dúbida. Cando se fala de choque de civilizacións ¿refírense ás grandes culturas relixiosas? ¿ é un eufemismo para non falar de batalla entre moros e cristiáns? ¿ou non ten nada que ver coa relixión? Non é unha pregunta retórica, en serio, é que non o acabo de pillar...

Vía: Menéame